Այս տորթը կարող են պատրաստել նույնիսկ նրանք, ովքեր խոհանոցում փորձ չունեն: Ստացվում է շատ նուրբ և թեթև: Նույնիսկ ջեռոց միացնելու անհրաժեշտություն չկա:
Անհրաժեշտ բաղադրիչներ.
խմորի համար՝
- ալյուր՝ 1,5 բաժակ
- շաքարավազ՝ 1 բաժակ
- սոդա՝ 1թ.գ.
- փխրեցուցիչ՝ 0,5 թ.գ.
- կակաո՝ 3ճ.գ.
- ձու՝ 1 հատ
- ձեթ՝ 50մլ
- կաթ՝ 0,5 բաժակ
- եռման ջուր՝ 0,5 բաժակ
կրեմի համար՝
- թթվասեր՝ 400մլ
- շաքարի փոշի՝ 200գ
- վանիլին
Պատրաստման եղանակ.
Խառնել չոր բաղադրիչները՝ ալյուր, շաքարավազ, փխրեցուցիչ, կակաո: Խառնել նաև հեղուկ բաղադրիչները՝ ձու, ձեթ, կաթ: Միացնել երկու զանգվածները, լավ խառնել ձեռքի հարիչով և ավելացնել եռացող ջուրը: Խառնել: Ստացվում է շատ թույլ խմոր:
Հակաայրվող մակերեսով 22սմ տրամաչափով տապակը դնել կրակին, որ տաքանա: Մեջը լցնել մոտ 100մլ խմոր և ծածկել կափարիչով: Կարևոր է, որ կրակը թույլ լինի: Կորժը կսկսի թխվել, ծակոտիներ կառաջանան: Երբ վերևի հատվածը դադարի կպչուն լինել, զգուշորեն շուռ տալ և թխել ևս 30 վարկյան:
Կրեմը պատրաստելու համար հարել թթվասերը, շաքարի փոշին և վանիլինը:
Երբ առաջին կորժը պատրաստ լինի, դնել հարթ ափսեի մեջ և կրեմ քսել: Ընթացքում թխել մյուս կորժերը և տորթ հավաքել՝ շերտերին կրեմ քսելով: Շերտերը շատ բարակ պատրաստել պետք չէ:
Տորթին բոլոր կողմերից կրեմ քսել: Վերջում կարող եք պատել շոկոլադե ջնարակով, փշրած բիսկվիթով կամ քերած շոկոլադով: Պահել սառնարանում 3-4 ժամ և մատուցել:
Բարի ախորժակ:
Նյութը հրապարակման պատրաստեց Arajininfo.ru կայքը