Ամիսներ առաջ համացանցում հայտնված տեսանյութը, որտեղ Ջրաշեն գյուղի բնակիչներից մեկը հայտարարել էր, որ իրենց համայնքի ավագանու անդամ Մացո Ուռուսյանն ունի վեցամյա կրթություն լայն տարածում գտավ: Անմիջապես հայտնվեցին բազմաթիվ մեմեր,հումորային գրառումներ ու ծիծաղաշարժ հոլովակներ :
«Հա ինչ, ինչ, հետո ինչ, չխառնիք»-ը դեռ ակտուալ է և շարունակում է մնալ հետհեղափոխական Հայաստանի ամենաշատ ցիտվող արտահայտությունների թոփ տասնյակում: Armdaily.am-ի հետ զրույցում տեսանյութի հերոսը՝ Մացո Ուռուսյանը, պատմեց, որ մեծ հնչեղություն ստացած դեպքից հետո ինքը բազմաթիվ նոր ընկերներ է ձեռք բերել:
Չնայած նրան, որ կային նաև վատ մեկնաբանություններ, այնուամենայնիվ, դրական արձագանքը ավելի շատ էր: Նրան հիմա փողոցում ճանաչում են, հաճախ մոտենում են, նկարվում : Չնայած նրան, որ միջադեպին հումորով է վերաբերվում, ֆեյսբուքյան իր էջում պարբերաբար կիսվում է իր հայտնի արտահայտությամբ նկարներով և տեսանյութերով, այնուամենայնիվ, դիմել է դատարան՝ ապատեղեկատվություն տարածող անձին պատասխանատվության ենթարկելու հայցով։
Դատական համակարգից բողոքում է, ասում է ՝ արդեն քանի ամիս է դատական պրոցեսը ձգձգվում է: Ինչպես ինքն է ասում, իր կրթությունը 6 ամյա չէ, պարզապես 9-րդ դասարանից հետո ուսումը չի շարունակել, որոշ ժամանակով լքել է Հայաստանը: Հիմա շարունակում է կիսատ թողածը: Սպիտակի քոլեջում է սովորում, հաշվապահական բաժնի երկրորդ կուրսի ուսանող է։
Ուռուսյանն ասում է ՝ շատ է ցանկանում հանդիպել Գագիկ Ծառուկյանի հետ, կարծում է, նա կօգնի աշխատանք գտնել,միակ հույսը հիմա այդ հանդիպումն ու Ծառուկյանն է: Եթե չստացվի, կարտագաղթի ԱՄՆ, մայիսին գրին քարտի խաղարկության է մասնակցելու:
Ավագանու անդամը Ծառուկյանի հետ հանդիպումից բացի, մի ցանկություն ևս ունի, ուզում է,որ վարչապետը կատարի իր բոլոր խոստումները, ինչպես ինքն է ասում՝ դրա համար ենք հեղափոխություն արել, որ խոստումները դառնան գործ:
