Ավագանու նիստի ժամանակ, որը կայացել էր հունվարի 8-ին, Հայկ Մարությանը հայտարարել էր, որ պիտի կանխեն և դադարեցնեն փողոցային առևտուրը։
Նա նաև նշել էր, որ իշխանությունը պիտի փողոցային առևտրով զբաղվողներին այլ տարբերակներ առաջարկի։
Նա շեշտել էր, որ առևտրականների համար պետք է հատուկ անվճար տեղեր հատկացվեն Երևանի շուկաներում: Քաղաքապետի հայտարարությունը դժգոհություն էր առաջացրել առևտրականների շրջանում և նրանք հունվարի 15-ին և 16-ին բողոքի ակցիաներ անցկացրեցին Երևանի քաղաքապետարանի մոտ, իսկ այսօր` Կառավարության շենքի դիմաց: Ակցիայի մասնակիցներից մեկը նշեց. «Չեք էլ կամենում, որ չոր հացի ու դեղի փող աշխատենք, 40 տարի կանգնել եմ Պրոսպեկտի շուկայում, նախորդ իշխանությունը շուկան վերավաճառեց, էսքան մարդու հանեց, գցեց դուրս: Խի մենակ Սերժը պետք ա ապրի՞, Սերժով պիտի ապրի՞ էս երկիրը. չորս կողմը սիթի ա սարքել…»:
Բողոքի ակցիա իրականացնողնեի հետ խոսեց ՀՀ վարչապետի մամուլի խոսնակ Վլադիմիր Կարապետյանը: Նա, առևտրականների բողոքին ի պատասխան, ասաց. «Ես խնդիրը հասկացա, հիմա կգնամ և հետամուտ կլինեմ ձեր հարցի պատասխանն ստանալուն»:
Աղբյուր՝ Մամուլ
