Ավելի վաղ հայտնել էինք, որ այսօր՝ օգոստոսի 24-ին ժամը 16:35-ին խոշոր հրդեհ է բռնկվել «Մալաթիա մոլ»-ում:
Դեպքի վայրում է գտնվում «Մալաթիա մոլ»-ի սեփականատեր Սամվել Ալեքսանյանը, նաև ՀՀ ոստիկանապետ Վալերի Օսիպյանը:
«Ծավալը մեծ էր, հարկ համարեցի ինքս գտնվեմ էստեղ ու ինքս գնահատեմ իրավիճակը»,- ասել է Օսիպյանը:
Չնայած փրկարարների հորդորներին՝ առևտրի կենտրոնի աշխատակիցները, վտանգելով իրենց, դուրս են բերում վաճառքի ենթակա ապրանքները:
«Արա, քելեք, օգնեք, վեշերը հանեք մի հատ»,- ասում է Սամվել Ալեքսանյանը:
Թեեւ հրդեհի բռնկման պատճառների մասին դեռեւս հստակ տեղեկատվություն չկա, բայց աշխատակիցները պատմում են, որ կրակը բռնկվել եւ սկսել է տարածվել «ՎԵԳԱ» խանութի պահեստային մասում:
Նշենք, որ ներսում գտնվող տեխնիկան հաջողվել է դուրս բերել, այս պահին աշխատակիցները շինության երկրորդ հարկի պատուհանից դուրս են նետում տեխնիկայի արկղերն ու տուփերը: Ներքեւում հավաքված քաղաքացիները պարբերաբար ջրի շշեր են նետում դեպի երկրորդ հարկ՝ փորձելով օգնել ներսում գտնվողներին:
Հիշեցնենք, որ կահույքը դուրս բերելիս տանիքում գտնվող աշխատակիցները մնացել էին արգելափակված, քանի որ կրակը տարածվել էր դեպի մուտքեր, նրանք փրկարարական աստիճանների օգնությամբ հասցրեցին լքել վտանգավոր հատվածը:
