Այս կոտլետները դուր են գալիս բոլորին։ Կարող եք պատրաստել և նախաճաշին, և ընթրիքին։ Շատ համեղ, հեշտ պատրաստվող և օգտակար։
Անհրաժեշտ բաղադրիչներ․
- ձու՝ 6 հատ
- սամիթ՝ 1 կապ
- կանաչ սոխ՝ 1 կապ
- սպիտակաձավար՝ 2ճ․գ․
- ալյուր՝ 1ճ․գ․
- ոչ քաղցր յոգուրտ բնական կամ հունական յոգուրտ՝ 1ճ․գ․
- բուսայուղ՝ 1ճ․գ․
- աղ
Պատրաստման եղանակ․
Ձուն եփել, թողնել, որ սառի, մաքրել։ Անցկացնել խոշոր քերիչով։
Կանաչին լվանալ, չորացնել և մանր կտրատել։ Խորը տարայի մեջ խառնել ձուն, կանաչին։ Ավելացնել սպիտակաձավարը, ալյուրը, աղը և յոգուրտը։ Լավ խառնել։
Ցանկության դեպքում կարող եք ավելացնել 1 հում ձու։ Այդպես կոտլետները ավելի լավ կպահեն ձևը։
Զանգվածը թողնել 10 րոպե, որ սպիտակաձավարը հասցնի ուռել։
Դրանից հետո թաց ձեռքերով միջին չափի կոտլետներ ձևավորել։
Տապակը դնել կրակին, ձեթ լցնել և սպասել, մինչ կտաքանա։ Կոտլետները դնել տապակի մեջ։ Տապակել միջին կրակի վրա՝ փակ կափարիչի տակ։
Կոտլետները տապակել յուրաքանչյուր կողմից մոտ 3-4 րոպե՝ մինչ ոսկեգույն կեղև կառաջանա։
Ցանկալի է մատուցել տաք վիճակում։
Բարի ախորժակ։
Նյութը հրապարակման պատրաստեց Arajininfo.ru կայքը
